लागूऔषध नियन्त्रण ब्युरो थाई गाँजा तस्करीके नयाँ शैली खुलासा कर्ती १८ किलो लागूऔषध गाँजासहित दुई भारतीय नागरिकहे पक्राउ करल बाटै । हवाई मार्ग हुँइती नेपाल एैना विदेशी यात्रुके निगरानी ओ प्रोफाइलिङ कर्ना क्रममे ब्युरोके त्रिभुवन अन्तर्राष्ट्रिय विमानस्थलस्थित कार्यालयसे खतल प्रहरी टोलीहे पक्राउ करल बाटै । ब्युरोके अनुसार गत २६ साउन रातके क्याथे प्यासिफिकके उडानमार्फत थाइल्यान्डके बैंककसे नेपाल आइल भारतीय नागरिक सञ्जीव कुमार ओ रवि कुमारहे सँगे लानल लागू औषध गाँजा लगेजमे लुकाके लानल रहित ।  उहा आगमनतर्फके भन्सार एरियामे लुकछूप बाहेर जैना क्रममे पक्राउ परल रहित । ्
पक्राउ परल दुनू जनासे १८ किलो गाँजा बरामद हूइल लागू औषध नियन्त्रण ब्युरोहूक्रे जानकारी देहल बाट । पक्राउ परल भारत पञ्जाब ठेगाना हूइल ३६ वर्षीय सञ्जीव कुमार ओ २६ वर्षीय रवि कुमार रहल बाट । ब्युरोके अनुसार थाइल्यान्डसे गाँजा लन्ना भारतीय नागरिकके त्रिभुवन अन्तर्राष्ट्रिय विमानस्थलमे आके पक्राउसे बच्ना आगमनतर्फके भन्सार एरियामे लुक्के जैना ओ कूछ दिनपाछे नेपाली एजेन्टमार्फत गाँजा लैजैना योजना बनाइल प्रारम्भिक अनुसन्धानसे खुलल बाट । प्रहरीे हूक्रे उइनके सँगसे १८ किलो लागू औषध गाँजासहित दुई थान पासपोर्ट, दुई थान मोबाइल फोन ओ चार थान झोला बरामद करल बाटै ।