सुदूरपश्चिम प्रदेश सरकार प्रदेश गौरवके आयोजनाके रूपमे सञ्चालन हुँइती आइल दुई सडकहे वैकल्पिक राजमार्गके रूपमे आघे बढैना निर्णय कर्ले बाटै ।
प्रदेश मन्त्रिपरिषद्के बुधबार साँझके बैठल बैठक डडेल्धुराके दैजी–लिप्ना–जोगबुढा–ढुंगाड–देउरा ओ कञ्चनपुरके बेलौरी–कलुवापुर–नायल–बुडर सडकहे वैकल्पिक राजमार्गके रूपमे विकास कर्ना निर्णय कर्ले रहित ।
प्रदेश सरकार यी दुनू सडकहे आर्थिक वर्ष २०७५÷७६ से प्रदेश गौरवके सडकके रूपमे आघे बढैती आइल बाटै ।
भौतिक पूर्वाधार विकास मन्त्रालयके अनुसार दैजी–लिप्ना–जोगबुढा–ढुंगाड–देउरा सडकके १३३ किलोमिटर ट्र्याक खोल्ले बाटै । कलेसे ३४ किलोमिटर सडक कालोपत्रे होगिल बा ।उक्त सडकमे हाल चार थो ठेक्का सञ्चालनमे बा । यस्तेक, बेलौरी–कलुवापुर–नायल–बुडर सडकके ट्र्याक खोल्ना काम सम्पन्न होसेकल बा । कलेसे १८ किलोमिटर सडक कालोपत्रे हूइल बा । उक्त सडकमे हाल एकथो ठेक्का सञ्चालनमे रहल मन्त्रालयहूक्रे जनाइल बाटै ।
धनगढीके बसपार्कहे प्रदेश प्राथमिकता प्राप्त आयोजना बनैना
मन्त्रिपरिषद् बैठक धनगढी उपमहानगरपालिका–३ स्थित शान्ति सामुदायिक वनके ४.८१ हेक्टर जमिनमे निर्माण हुइना बसपार्कहे प्रदेशके प्राथमिकता प्राप्त आयोजना सूचीमे समावेश कर्ना निर्णयसमेत कर्ले बाटै ।
उक्त आयोजना प्रदेशके प्राथमिकता प्राप्त आयोजना हूइल व्यहोरा नेपाल सरकारसमक्ष अनुरोध कर्ना निर्णय करल प्रदेश सरकारके प्रवक्ता ओ उद्योग, पर्यटन, वन ओ वातावरणमन्त्री प्रकाश रावल जानकारी देलै ।
भोटेकोशी बाढीप्रति शोक प्रस्ताव
बैठकमे रसुवाके भोटेकोशी नदीमे आइल विनाशकारी बाढीसे हूइल जनधनके क्षतिप्रति दुःख व्यक्त कर्ती शोक प्रस्ताव पारित कर्ले बाटै ।
बाढीमे ज्यान गुमैना नागरिकप्रति श्रद्धाञ्जली अर्पण कर्ती शोकसन्तप्त परिवारजनप्रति गहिरो समवेदना ओ घाइतेके शीघ्र स्वास्थ्यलाभके कामना कलै मन्त्री रावल बताइल बाटै ।
छुट्टाछुट्टै शौचालय ओ स्तनपान कक्ष निर्माण कैना
बैठकमे प्रदेश सचिव धर्मराज जोशीहे आन्तरिक मामिला ओ कानुन मन्त्रालयमे पदस्थापन कर्ना निर्णय कर्ले बाटै । वस्तेके, प्रदेश सरकार मातहतके निकायमे महिला, पुरुष, अपांगता हूइल व्यक्ति ओ लैंगिक यौनिक अल्पसंख्यकके लाग छुट्टाछुट्टै शौचालय निर्माण कर्ना निर्णय कर्ले बाटै । प्रदेश सरकार मातहतके निकायमे स्तनपान कक्ष निर्माण कर्ना ओ सब निकायमे सेनेटरी प्याड उपलब्ध कर्ना निर्णयसमेत मन्त्रिपरिषद्हूक्रे करनै प्रवक्ता रावल जानकारी देले बाटै ।
